Por E.P. | SANTIAGO DE COMPOSTELA | 07/05/2020 | Actualizada ás 19:06
A Plataforma de Contratos Públicos de Galicia publica este xoves a licitación por 1,35 millóns de euros do servizo de desenvolvemento dunha rede de aforamentos nos ríos de áreas con risco potencial significativo de inundacións (ARPSI) da demarcación hidrográfica Galicia-Costa.
Diso informou a Consellería de Infraestruturas nun comunicado, no que explica que as empresas interesadas nestes traballados poderán presentar as súas ofertas ata o próximo día 16 de xuño.
Segundo indicou o departamento autonómico, o organismo hidráulico dispón dun programa de medidas establecido no Plan de xestión de risco de inundacións da demarcación Galicia - Costa, no que destacan as medidas e actuacións encamiñadas a reducir os efectos negativos producidos polas inundacións.
Con este contrato, a Consellería de Infraestruturas e Mobilidade, a través de Augas de Galicia, destacou que busca implantar unha rede de estacións de control dos niveis de caudal a tempo real nos puntos máis significativos das áreas con risco potencial significativo de inundacións de Galicia-Costa.
Para iso, instalaranse 50 estacións de medidas dos aforamentos nas seccións de control da rede fluvial, unha rede que complementará a información existente actualmente nos 43 puntos da rede hidrográfica de Galicia-Costa.
A Xunta destacou que o traballo de control da evolución dos caudais en determinadas seccións das áreas de risco potencial de inundacións resulta fundamental como información basee para os sistemas de alerta.
Deste xeito, a información concreta en tempo real que se obtén a través da rede de aforamentos serve de axuda á administración hidráulica da Xunta e ás autoridades competentes á hora de adoptar as medidas de protección ou evacuación que sexan necesarias en cada momento.
MANTEMENTO
A Administración autonómica indicou que na liña das distintas medidas de actuación que desenvolve nos ríos da demarcación Galicia-Costa, Augas de Galicia tamén licitou esta semana o mantemento da rede actual de estacións de aforamentos, que permiten o seguimento dos niveis de caudal nos ríos da demarcación, cun investimento de máis de 640.000 euros.
Os traballos a contratar inclúen a explotación e mantemento das estacións de aforamento e dos aparellos de medida localizadas nos ríos da demarcación e a realización de aforamentos directos nos ríos. As empresas interesadas nestes contratos poderán presentar as súas ofertas ata o próximo 15 de xuño.
Mediante estas estacións de aforamentos, Augas de Galicia realiza o control da variación dos niveis de auga en tempo real en 43 puntos da rede hidrográfica de Galicia-Costa, o que permite ter información dos caudais circulantes en cada momento.
A Xunta sinalou que estas permiten facer o seguimento das situacións hidrolóxicas extremas en tempo real, tanto inundacións como fenómenos de seca, o que constitúe unha ferramenta básica de axuda na toma de decisións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.