A Fiscalía mantén abertas dilixencias de investigación penal sobre 8 residencias de Galicia
Son as mesmas abertas a pasada semana.
Por Europa Press / Redacción | Santiago de Compostela | 19/05/2020 | Actualizada ás 19:29
A Fiscalía Superior de Galicia mantén abertas dilixencias por seis denuncias relacionadas coa xestión de casos de coronavirus en 8 residencias de maiores, as mesmas que mantiña abertas a semana pasada.
De acordo con datos achegados este martes pola Fiscalía Xeral do Estado (FGE), non houbo cambios na investigación penal nos centros xeriátricos galegos por parte do Ministerio Público.
En concreto, figuran no informe procedementos de investigación por catro denuncias presentadas con respecto a outras tantas residencias de maiores da provincia de Ourense (segundo transcendeu, unha é A nosa Señora da Esperanza) e outras dúas dilixencias por dúas denuncias na Fiscalía da Coruña, unha delas sobre unha residencia, e outra denuncia sobre outro tres.
A Fiscalía Xeral aínda inclúe nos datos trasladados este martes un procedemento xudicial aberto nun xulgado de Cangas, aínda que xa foi arquivado o pasado 21 de abril porque, segundo a maxistrada, non había "indicios suficientes da perpetración de delito" e non había concreción nos feitos denunciados.
Por outra banda, a Fiscalía galega tamén iniciou dilixencias por unha denuncia por malos tratos nunha residencia na Fonsagrada (Lugo), e que arquivou porque xa está xudicializada. Así mesmo, abríronse dilixencias por denuncias sobre protocolos en residencias por parte da Fiscalía de área de Santiago; e dilixencias por unha denuncia presentada por un terapeuta dunha residencia de Ourense, en relación coa atención a vítimas de violencia de xénero.
Ademais, figuran como arquivadas varias dilixencias penais, entre elas unha denuncia xenérica interposta por Vox sobre a situación das residencias galegas, así como outras tamén de carácter xenérico.
