Por Europa Press / Redacción | SANTIAGO DE COMPOSTELA | 29/05/2020 | Actualizada ás 12:19
O deputado de Unidas Podemos e portavoz da coalición Galicia en Común-Anova Mareas, Antón Gómez-Reino, cualificou esta xornada como "un día histórico" no que o Consello de Ministros aproba o Ingreso Mínimo Vital (IMV), o "escudo social" do sistema "fronte ás Cayetanas", en referencia á deputada do PP Cayetana Álvarez de Toledo.
Gómez-Reino tamén subliñou este venres en rolda de prensa como esta medida "chega para combater a desigualdade xerada por anos de políticas neoliberais, recortes e a reforma laboral" e fixo fincapé na idea de que Galicia en Común "non está en contra da riqueza", pero queren que "se reparta para acabar coa pobreza".
Ao seu xuízo, esta renda mínima "iguala" España a "as democracias que tratan sempre de construír sistemas redistributivos da riqueza que acaben coa desigualdade" e sitúase fronte ás "aristocracias", "fronte ao ruído, odio e división que crean as dereitas".
Este ingreso resulta "fundamental para que ninguén quede atrás, tampouco en Galicia", xa que o portavoz de Galicia en Común considera que a Renda de Inclusión Social de Galicia (Risga) --unha prestación pública da Xunta para a protección social-- é "insuficiente, escuálida e deficiente".
Por este motivo, como un partido que aspira a gobernar a Xunta tras as eleccións, o próximo 12 de xullo, Gómez-Reino comprometeuse a converter a Risga en "unha ferramenta que combata a desigualdade e pobreza xerada no últimos dez anos por gobernos como o de Feijóo".
Neste sentido, o portavoz da coalición galega criticou que ao titular da Administración autonómica, Alberto Núñez Feijóo, "o que lle preocupa do Ingreso Mínimo Vital é que non leve o logo da Xunta de Galicia".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.