Por Galicia Confidencial | Santiago de Compostela | 29/05/2020 | Actualizada ás 22:00
A falta de entendemento entre dúas consellerías, a de Sanidade e a de Política Social, en materia de atención aos maiores é tan evidente que levaron a que o presidente da Xunta anunciase logo do consello deste venres que os centros de día non abren despois de que a Dirección Xeral de Asistencia Sanitaria do Sergas aprobase e fixera público un plan de reativación desas instalacións a mediados do mes de maio.
Así o anunciou Feijóo logo do consello do Goberno autonómico, só dúas semanas despois de que a consellería de Sanidade engadise, no punto número sete do plan de reactivación do sector sociosanitario, un apartado específico para regular a reapertura dos centros de día na comunidade.
Agora, tras modificar a Xunta o plan de reactivación que o propio Sergas enviara xa aos centros residenciais e de día da comunidade autónoma, moitos centros de día teñen que anunciar que ata o mes de setembro non se retomará a actividade.
Un deses casos é o centro Raiola de Verín que tiña anunciada a súa volta á normalidade o vindeiro día 1 de xuño, toda vez que, dende a Dirección Xeral de Asistencia Sanitaria, se ditasen as instrucións precisas para que as instalacións de atención diurna para maiores, tanto dependentes da Xunta de Galicia, como de titularidade municipal (o caso do centro de día de Verín), volvesen á súa actividade.
A directora de Raiola, Chelo Ferreiro, manifestou no Diario do Támega estar "totalmente abraiada por este xiro dado de súpeto e despois de que dende o propio Sergas se fixera público un plan de reactivación que permitía a reapertura dos centros de día. De feito, xa se mantiveran contactos coas familias e se tomaron todas as medidas que o propio Sergas indicaba para que o centro de día poidese recuperar a súa actividade".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.