O xulgado ordena que a causa polo desaloxo da Comandancia de Obras da Coruña siga contra sete persoas

Houbo desfeitas no local de Marea Atlántica, que estaba á fronte do goberno local en 2018.

Por E.P. | Santiago de Compostela | 09/06/2020 | Actualizada ás 18:47

Comparte esta noticia

O Xulgado de Instrución número 6 da Coruña concluíu a investigación sobre os incidentes durante o desaloxo da Comandancia de Obras desta cidade e as posteriores protestas e ordena que a causa siga contra sete persoas, segundo informa o Tribunal Superior de Xustiza de Galicia (TSXG).

Desaloxo da antiga Comandancia de Obras da Coruña.
Desaloxo da antiga Comandancia de Obras da Coruña.

Os feitos remóntanse ao 23 de maio de 2018 --durante o goberno de Marea Atlántica-- cando se estableceu un dispositivo de vixilancia e control a cargo de axentes da Policía Local, no antigo edificio da Comandancia de Obras, sito na avenida Metrosidero e de titularidade municipal.

O obxectivo era, segundo recolle o auto, "asegurar o desaloxo e recuperación das instalacións que foran ilicitamente ocupadas". O dispositivo conseguiu recuperar as instalacións de forma pacífica posto que nese momento, á primeira hora da mañá, non se achaba ninguén no interior.

Con todo, sobre as 12,30 horas os axentes integrantes do dispositivo foron requiridos polos seus superiores para que saísen do recinto e se colocasen diante da porta ao congregarse diante do inmoble "unhas 60 persoas na vía pública", que acudiran convocadas a través das redes sociais e que portaban pancartas reclamando a recuperación da instalación como 'centro social ocupado'.

Máis tarde, aumentou a afluencia de persoas e produciuse o corte de tráfico na zona, segundo recolle o auto. Tres dos axentes tiveron tamén que empolicarse ao tellado para facer que baixasen dous manifestantes que rubiran polos muros.

No marco destas protestas, segundo conclúe, "un grupo de entre dez e quince persoas, actuando de maneira concertada, vestidas con roupa escura e encapuchadas, portando mazas, martelos e lastros, ocasionaron importantes danos na sede do partido político Marea Atlántica".

POSIBLES DELITOS

Os feitos, segundo as actuacións practicadas, poderían ser constitutivos de delitos de desordes públicas, atentado, lesións e danos. A xuíza ordena agora que a causa se siga contra sete persoas.

En concreto, por se os feitos que se lle imputan a dous dos sospeitosos fosen constitutivos de delitos de desordes públicas, atentado e lesións e a outros tres, de desordes públicas e atentado. Os dous investigados restantes, segundo o auto, presuntamente incorreron nun delito de danos agravados por supostamente causar desfeitas no local de Marea Atlántica.

A xuíza acorda, mentres, o sobresemento provisional e arquivo respecto da denuncia formulada por un dos investigados ao non detectar indicios de delito.

Contra o auto que pon fin á instrución cabe presentar recurso. A xuíza ordena nel que se dea traslado ao Ministerio Fiscal e ás acusacións particulares para que no prazo de dez días soliciten a apertura de xuízo oral formulando escrito de acusación ou, no seu caso, o sobresemento da causa. Excepcionalmente, tamén poderán pedir a práctica de dilixencias complementarias.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta