Un ferrolán agardaba recibir 4 quilos de cocaína que foi incautada en Barajas, oculta en caixas de picado de carne

A Audiencia Provincial da Coruña celebrará os días 14 e 15 de maio o xuízo contra un home acusado dun delito contra a saúde pública, informa o Tribunal Superior de Xustiza de Galicia (TSXG). No seu escrito de cualificación, o Ministerio Público sostén que o 4 de setembro de 2024, como resultado dunha análise efectuada no aeroporto de Madrid-Barajas, detectouse no almacén do recinto aduaneiro a existencia dun envío que presentaba unha densidade que podía corresponder a sustancias estupefacientes.

Por iso, procedeuse á súa apertura atopándose no seu interior 48 latas de picado de carne cada unha das cales contiña un dobre fondo no que se ocultaba unha sustancia esbrancuxada que, ao aplicarlle un narcotest, deu resultado positivo en cocaína. O referido envío contaba cun peso declarado de 6.205 gramos, procedía de Luque (Paraguai) e o seu destinatario era, sostén Fiscalía, o acusado, con domicilio en Ferrol.

"Sendo este o encargado de recibir a sustancia estupefaciente cuxo destino era obter un lucro coa súa comercialización ilegal", sinala no seu escrito de cualificación no que asegura que as latas contiñan 4.007,40 gramos de cocaína cunha pureza do 89,08 % e cuxa venda no mercado suporía 147.686,51 euros. Para o Ministerio Público, os feitos son constitutivos dun delito contra a saúde pública por tráfico de sustancias estupefacientes polo que solicita para o home sete anos de cárcere.

Pasaxeiros con maletas na terminar T4 do Aeroporto Adolfo Suárez Madrid-Barajas, a 24 de xullo de 2020 | Fonte: Eduardo Parra - Arquivo