Por E.P. | SANTIAGO DE COMPOSTELA | 11/06/2020 | Actualizada ás 15:21
O delegado do Goberno en Galicia, Javier Losada, reiterou este xoves ao sector da acuicultura e o marisqueo galego que ten o apoio do Executivo central para que poida desenvolver a súa actividade "con plenas garantías xurídicas e ambientais" e que o Ministerio de Transición Ecolóxica terá en conta as súas achegas na futura reforma da lei de costas.
Losada participou nun encontro con representantes do sector tras manifestar estes a súa preocupación por algúns dos preceptos do proxecto de lei de cambio climático, que consideran que pon en risco a un centenar de empresas situadas na costa galega.
En concreto, sobre o artigo 18 da devandita proposta lexislativa, que fai referencia a consideración do cambio climático na xestión do dominio público marítimo-terrestre, Losada insistiu en que o sector "non ten que ter motivos de preocupación", de acordo cun comunicado.
O prazo das concesións ao que fai referencia o artigo "respecta a lexislación básica que fixa en 75 anos o período máximo". "Este máximo non afecta economicamente o sector marítimo alimentario pola sinxela razón de que a normativa sectorial vixente fixa prazos inferiores aos 75 anos para estas actividades", incidiu.
O sector, afirmou Losada, é de "relevancia estratéxica" para a economía do litoral de Galicia, o que "obriga máis que nunca" a dotalo de seguridade xurídica para que se desenvolva "no espazo físico actual en condicións de seguridade ambiental e respectando a natureza.
No encontro, por vía telemática, participaron representantes da Asociación Empresarial de Acuicultura, do Clúster da Acuicultura, da Asociación Galega de Depuradores e Comercializadores de Moluscos, da Asociación Nacional de Fabricantes de Conservas de Peixe e da Federación de Asociacións de Mexilloeiros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.