Galicia en Común apela a converter os aplausos en medidas que melloren as condicións dos sanitarios
A Confederación de Sindicatos Médicos de Galicia solicita á formación que "medie" para que o Goberno aumente as prazas MIR.
Por E.P. | SANTIAGO DE COMPOSTELA | 15/06/2020 | Actualizada ás 18:07
O candidato á Presidencia da Xunta pola coalición Galicia en Común-Anova Mareas, Antón Gómez-Reino, apelou a converter "os aplausos" aos profesionais sanitarios en medidas que melloren as súas condicións laborais.
Este luns, a cabeza da lista da coalición e o número un por Pontevedra, Eva Solla, mantiveron un encontro telemático con representantes da Confederación de Sindicatos Médicos de Galicia (CESM), que solicitaron a Galicia en Común que "medie" ante o Goberno para que aumenten as prazas MIR e implante unha xornada laboral de 35 horas.
Gómez-Reino lembrou o compromiso de pór en marcha "un plan de choque" desde a Xunta se En Común participa do Goberno galego tras as eleccións autonómicas do próximo 12 de xullo para acabar coa "precariedade" no Servizo Galego de Saúde (Sergas).
Así mesmo, tamén mostrou a súa preocupación pola posibilidade de que se produza un rebrote de coronavirus durante as próximas semanas, polo que instou a Xunta a elaborar un protocolo de cara a minimizar o seu posible impacto.
Neste sentido, sinalou que deben repartirse equipos de protección individual e produtos de desinfección en todo o territorio galego e para todo o persoal sanitario. Tamén reclaman ao Goberno autonómico que desinfecte de forma periódica todas as residencias de maiores, que ademais han de contar un plan de medicalización inmediata.
CESM
Pola súa banda, segundo informa CESM nun comunicado emitido aos medios tras a reunión, o sindicato solicitou á coalición que inclúa no programa medidas encamiñadas a "lograr unha conciliación laboral e familiar efectiva".
Tamén reclaman que a Administración autonómica dea pasos cara a terminar coa "precariedade laboral" no Sergas e evite que se produzan "fugas" de facultativos "á sanidade privada ou outras comunidades ou países onde se recoñece e se valora" a súa actividade.
