Por Galicia Confidencial | A Coruña | 24/07/2020 | Actualizada ás 12:19
Unha UVI medicalizada tivo que trasladarse este venres pola mañá ao hotel onde permanece confinada o corpo técnico do Fuenlabrada tras recibir un aviso de que un dos integrantes do equipo sufrira unha síncope.
Finalmente, o equipo médico desprazado decidiu trasladar a este membro do equipo do Fuenlabrada a un hospital da cidade herculina para a súa recuperación.
Segundo fontes consultadas por GC, o home esvaeceu no momento no que se ían realizar novas PCRs tras confirmarse este xoves que o reconto de contaxios ascenden a 12 positivos por coronavirus.
"Unha vez recibidos os resultados dos PCR realizados pola Xunta de Galicia na mañá do 23 de xullo, desde o CF Fuenlabrada queremos informar de que hai dous positivos máis e que ascenden a un total de 12 na expedición, máis os catro que quedaron en Madrid. Desde o Club desexámoslles a todos unha pronta recuperación aos 16 afectados", anunciou o club a última hora.
Pouco antes, o Sergas informou que os resultados obtidos nas probas realizadas polo laboratorio de microbioloxía da área Sanitaria da Coruña este xoves confirman eses 12 os casos positivos, incluídos o seis previamente diagnosticados como positivos o pasado martes por este mesmo laboratorio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.