Estabilizado o maior incendio do ano en Galicia, en Monterrei

O incendio que, segundo as últimas estimacións, queimou 450 hectáreas en Monterrei (Ourense) está estabilizado, do mesmo xeito que outro lume declarado esta tarde no municipio coruñés de Noia, informaron fontes da Consellería do Medio Rural.

No caso de Monterrei, deuse por estabilizado ao redor das 16,00 horas deste sábado. Este lume comezou o venres na parroquia de Flariz e a súa proximidade a algunhas vivendas provocou que se activase durante unhas horas na madrugada do sábado unha alerta (situación 2). Con 450 hectáreas afectadas estimadas, é o máis grande no que vai de tempada e ano en Galicia.

Por outra banda, a parroquia de Santa María de Argalo, en Noia, rexistrou este domingo un incendio que comezou ao redor das 16,15 horas e quedou estabilizado ás 17,49. Están afectadas dúas hectáreas e no lugar despregáronse tres avións, tres helicópteros, catro axentes, oito brigadas e catro motobombas.