Por Europa Press / Redacción | Ourense | 30/07/2020 | Actualizada ás 18:21
A alerta decretada pola proximidade do lume iniciado no concello ourensán de Cualedro a casas do municipio veciño de Monterrei --parroquia de San Cristovo-- foi desactivada ás 17,45 horas deste xoves. Este incendio, o máis grande rexistrado no que vai de tempada de alto risco en Galicia, segue sen control e arrasou xa un milleiro de hectáreas.
Con todo, quedou extinguido na tarde deste xoves o outro incendio declarado o pasado venres na parroquia de Flariz, en Monterrei (Ourense), tras arrasar en case unha semana unha superficie de 720 hectáreas, das cales 420 son forestais (370 rasas e 50 arboradas) e 300 agrícolas.
Precisamente, este lume tamén obrigou o pasado venres a decretar a alerta por proximidade do lume ás casas no núcleo de Salgueira.
Nos labores de extinción do que ata agora é o segundo incendio máis grande rexistrado en Galicia traballaron catro técnicos, 34 axentes, 89 brigadas, 36 motobombas, dúas pas, nove helicópteros, 12 avións, así como os efectivos da Unidade Militar de Emerxencias (UME).
ACTIVO UN NOVO INCENDIO EN RODEIRO
Ademais, ás 15,26 horas rexistrouse outro incendio no municipio pontevedrés de Rodeiro que afecta xa a unhas 20 hectáreas de terreo.
Segundo informou a Consellería de Medio Rural, nos labores de extinción traballan seis avións, cinco helicópteros, catro axentes, dez brigadas, sete motobombas e unha pa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.