O 80% dos técnicos de incendios secundan a folga indefinida cun servizos mínimos case do 100%
Piden melloras nas súas condicións laborais.
Por Europa Press / Redacción | SANTIAGO DE COMPOSTELA | 01/08/2020 | Actualizada ás 15:17
Os técnicos forestais do Servizo de Prevención de Incendios Forestais iniciaron este sábado a súa folga indefinida, que calculan que está a secundar o 80 por cento do persoal, e concentráronse ante os centros de coordinación provincial para reclamar melloras laborais.
Estes profesionais criticaron a actitude "irresponsable" da Consellería do Medio Rural, á que acusan de "non querer solucionar mediante o diálogo" os problema. As súas reivindicacións, defenderon, son "xustas".
O representante da CIG, Xabier Bruña, explicou que están a exercer o seu dereito a folga con "responsabilidade" en plena campaña de alto risco de incendios e que se están cumprindo os servizos mínimos, de forma que funcionan ao 90 ou o 95 por cento, dependendo das quendas e en número de traballadores en cada centro.
A idea con esta folga e as concentracións é "sensibilizar" sobre as súas demandas tanto socialmente como nos propios centros de traballo, explicou Bruña. Polo momento, apuntou, non tiveron máis contactos coa Consellería do Medio Rural, unha vez pactados os servizos mínimos o xoves.
Os sindicatos que apoian a folga, CC.OO., UXT, CIG e CSIF, manifestaron que en setembro de 2019 a Xunta comprometeuse a elaborar unha proposta integral sobre as novas condicións de traballo, pero ese documento non foi presentado aínda, polo que o colectivo decidiu mobilizarse.
Este sábado arrincou a folga indefinida e os técnicos concentráronse entre as 11,00 e as 12,30 horas na Coruña, Lugo, Ourense e Pontevedra. Teñen previstas máis protestas ao longo do mes de agosto.
