Galicia e Portugal acordan controlar conxuntamente a evolución da covid tras a polémica polo rexistro de turistas
Os departamentos de sanidade compartirán información sobre os datos da pandemia nas súas áreas sanitarias.
- A Xunta inclúe agora a Madrid no rexistro de control de viaxeiros e exclúe a Portugal e A Rioxa
- Malestar en Portugal pola súa inclusión na "lista negra" de turistas da Xunta sen avisar
- Feijóo recoñece erros na inclusión de todo Portugal no rexistro de turistas
Por Galicia Confidencial | SANTIAGO DE COMPOSTELA | 07/08/2020 | Actualizada ás 13:42
Galicia e Portugal estreitarán os seus lazos a nivel sanitario para facer fronte á pandemia de covid. Así o comunicou a Consellería de Sanidade pouco despois da reunión telemática do conselleiro Vázquez Almuiña, co Secretario de Estado da Saúde do Ministerio de Saúde de Portugal, António Sales.
O obxectivo desta reunión foi establecemento dunha colaboración para intercambiar información sobre a evolución da situación epidemiolóxica por mor da covid-19, tanto en Galicia como en Portugal. Deste xeito, a comunidade autónoma galega facilitará datos correspondentes as súas áreas sanitarias, mentras que Portugal fará o propio coa información das súas rexións.
Dende a Xunta celebran este intercambio de información como un paso máis do "espíritu de colaboración" que "tradicionalmente manteñen Galicia e Portugal", un lazo que "cobra agora unha especial relevancia por mor da loita contra a pandemia mundial da covid-19". Dende a Consellería destacan, á parte, o "continuo tránsito de viaxeiros a un lado e outro da fronteira", que nos últimos meses xerou numerosas queixas e quebradoiros de cabeza.
Esta colaboración chega logo da polémica suscitada no país veciño despois de que a Xunta o incluíra na listaxe de viaxeiros que teñen que rexistrarse pola alta incidencia de casos covid nos seus lugares de procedencia. Posteriormente, e tras a polémica en Portugal, Feijóo recoñeceu que había que revisar os datos.
