Orde de afastamento para un home denunciado por agredir a un militante de Vox

O Xulgado de Instrución número 5 da Coruña ditou unha medida cautelar contra un home denunciado por agredir a un militante de Vox o pasado 7 de xullo e impídelle achegarse ao denunciante a menos de 100 metros, aproximarse ao seu domicilio ou lugares que frecuente e comunicarse con el por ningunha vía.

O texto sinala que a Policía Nacional instruíu un ateigado o 7 de xullo por un presunto delito de lesións e outro dos denominados de odio, derivado da denuncia presentada polo mozo simpatizante de Vox.

O auto indica que "existen indicios racionais da comisión dun delito de lesións" e que iso se "infere" da existencia dun parte de médico datado o mesmo día dos feitos denunciados, no que o denunciante narra que foi agredido dunha forma "que se corresponde coas lesións que presenta".

Tamén existen "indicios racionais suficientes" para considerar, nesta fase de instrución, que "o agora investigado aparece como posible autor do delito de lesións e doutro dos denominados de odio", agrega o texto. Os acompañantes do mozo agredido achegaron as fotografías nas que se ve ao denunciado nas inmediacións do lugar onde ocorreron os feitos.

O auto indica tamén que os feitos deben porse "no contexto dunha serie de accións que se viñeron sucedendo contra o prexudicado e, en termos máis xerais, contra a formación política da que é simpatizante". Ademais, hai "unha serie de mensaxes vexatorios e ameazantes" que o denunciante recibiu por mor destas dilixencias, agrega o documento.