Piden axudas urxentes para o sector da carne de vacún pola "caída crónica" de prezos por culpa da COVID

O Sindicato Labrego Galego (SLG) pediu axudas urxentes para o sector da carne de vacún ante a "caída crónica" de prezos provocada pola pandemia sanitaria da COVID-19.

Nun comunicado remitido aos medios, a organización agraria censura que o sector da carne de vacún "siga sen recibir ningún tipo de apoio ou axuda" a pesar de ser un dos máis afectados pola crise da COVID-19 polo impacto do confinamento e o peche da hostalaría.

Así, indica que o prezo medio das liquidacións entre abril e xuño de 2020 foi de 4,17 euros por quilo en tenreira de calidade suprema e de 3,5 euros quilos en tenreira normal. "Aínda que os datos do mes de marzo non mostran unha baixada moi forte respecto de marzo de 2019, en abril, maio e xuño apréciase un descenso ao redor dos 50 céntimos por quilo en Tenreira Suprema e outro tanto na normal", apunta o SLG.

Así mesmo, a organización denunciou o feito de que a crise estea a ser utilizada por industrias e distribución para "impor unha baixada xeneralizada dos prezos" aproveitando "o abandono de funcións por parte do Ministerio de Agricultura e da Consellería do Medio Rural".

Por todo iso, o sindicato considerou necesario activar axudas directas, de forma urxente e a curto prazo, para o sector da carne de vacún, unhas axudas que pide que se orienten a paliar as perdas producidas pola COVID-19 e a garantir a continuidade das granxas, "moitas delas en zonas desfavorecidas e de alta montaña".

"A mellor forma de activar estas axudas sería autorizar un pago adicional por becerro sacrificado vinculado á vaca abastecedora que permita equilibrar os prezos ou facer un pago directo por vaca abastecedora ou granxa, xa que se estaría pagando directamente a quen produce os gastos", sinala.

Isabel Vilalba, secretaria xeral do SLG