Recoñecen o cancro por sílice como enfermidade profesional a pesar das presións de empresas mineiras
O Consello de Estado declara que hai suficiente evidencia científica para demostrar o perigo canceríxeno do po de sílice. As mineiras alegaban que recoñecer esta enfermidade “supoñía imporlle ás empresas cargas inxustificadas”.
Por Galicia Confidencial | Santiago de Compostela | 30/08/2020 | Actualizada ás 11:02
A Plataforma Veciñal Mina O Pino-Touro Non emitiu un comunicado para dar a coñecer o ditame do Consello de Estado (CE) onde se recoñece que “existe un amplo consenso dentro da comunidade científica sobre a natureza canceríxena do po de sílice en suspensión”. A Plataforma lembraba no comunicado que o ditame do CE “desminte o negacionismo sobre cancro” do po de sílice “que defendían as mineiras de Touro e San Finx”.
Os colectivos ecoloxistas e veciñais consideran que as empresas mineiras están exercendo un papel de lobby para evitar a reforma do “Real Decreto 1299/2006 de 10 de novembro”. Esta reforma ampliaría o cadro de enfermidades profesionais dentro do sistema de Seguridad Social. Segundo a Plataforma as empresas “alegaban que recoñecer este tipo de enfermidade supoñía “impor ás empresas cargas inxustificadas””.
Concretamente, as asociacións veciñais e ecoloxistas acusaban ás empresas Francisco Gómez SL, de Touro, Tungsten San Finx SL, filial de Valoriza Minería, xunto coa Cámara Oficiam de Minería de Galicia (COMG) e Asociación Galega de Áridos (ARIGAL) de buscaren impedir unha modificación da lexislación sobre doenzas profesionais para que o cancro de pulmón por sílice en suspensión non se recoñecese como enfermidade laboral.
“Pretendían ademáis que, para recoñecer o cancro de pulmón por exposición á sílice, os pacientes deberían ter que padecer previamente silicose, en contra da evidencia científica actual” din no comunicado enviado desde a Plataforma Veciñal. Así mesmo, sinalan que todo isto sucede “a pesar de que entidades como a Cámara Oficial Mineira reciben millóns de euros da Xunta de Galicia” para programas de “prevención das doenzas profesionais relacionadas coa exposición ao pó de sílice convocatoria tras convocatoria”.
