O BNG propón a eliminación das comisións bancarias, especialmente para persoas desfavorecidas
Pide que se regule o deber, por parte das entidades bancarias, de aplicar de forma automática 'Contas de Pago Básicas' sen comisións.
Por Europa Press / Redacción | SANTIAGO DE COMPOSTELA | 07/09/2020 | Actualizada ás 13:41
O Bloque Nacionalista Galego presentou no Congreso unha proposición non de lei para reclamar a eliminación das comisións bancarias, sobre todo para aquelas persoas en risco de exclusión social.
En concreto, o deputado nacionalista, Néstor Rego, apuntou que contar cunha conta bancaria é "un servizo básico imprescindible para toda a cidadanía", polo que "resulta abusivo o cobro destas comisións aos usuarios".
O deputado engadiu que "é case obrigatorio contar, canto menos, cunha conta aberta nun banco ou caixa de aforros onde poder recibir os ingresos da nómina, pensión ou subsidio" ou desde a que facer pagos que "deben constar necesariamente mediante transferencia bancaria".
Como exemplo, Néstor Rego puxo o Ingreso Mínimo Vital, que se destina á poboación en maior situación de vulnerabilidade, pero que "debe ser recibido a través dunha conta bancaria necesariamente e sobre esa conta deberán pagarse comisións".
Neste sentido, esixe que se regule o deber por parte das entidades bancarias de aplicar de forma automática 'Contas de Pago Básicas' sen comisións para todas aquelas persoas que, por recibir subsidios ou axudas públicas xa teñan acreditada a súa situación de vulnerabilidade. Ademais, pide que sexa obrigatorio que as entidades bancarias oferten esta posibilidade a todos os seus usuarios e usuarias.
