Unha familia británica atopa un gran tronco á deriva cheo de percebes e pensan que é un alien
Varios medios británicos deron conta da noticia. Despois dunha busca en Google, decatáronse que estaban diante do marisco máis exclusivo de toda Europa.
Por Galicia Confidencial | SANTIAGO DE COMPOSTELA | 13/09/2020 | Actualizada ás 10:00
Unha famila descubriu unha morea de percebes adheridos a un tronco nunha praia de Gales. A familia ao principio pensou que podería ser vida extraterrestre.
Desta maneira, o medio británico EuroWeekly e tamén outros medios como DailyMail e WalesOnline, falan de como a muller encontrou o tronco cheo de percebes a beira do mar e despois chamou á súa familia porque non sabía que era.
O fillo buscou en Google que poderían ser estas criaturas e achou que eran "Goosenecked Barnacles", chamados en Galicia e Portugal "percebes" e que tiñan un gran valor no mercado, sendo un dos mariscos máis exclusivos de Europa.
Martyn Green, o pai da familia, ao decatarse do exclusivos que son e do valor que tiñan os percebes que encontrou, sobre 55.000 euros, decidiu manter en secreto a súa localización.
GORDON RAMSEY
Hai case unha década, o afamado chef Gordon Ramsey visitou as nosas costas para descubrir o mundo destes moluscos, indo el a faenar e despois preparándolle aos percebeiros un prato de percebes "tapas style".
