Por Galicia Confidencial | Compostela | 01/04/2013 | Actualizada ás 16:32
PSdeG, AGE, BNG e CXG. Todos coincidiron este luns en reclamar a dimisión do presidente da Xunta pola súa amistade co narcotraficante Marcial Dorado.
O secretario xeral do PSdeG, Pachi Vázquez, dixo que "non hai ninguén en Galicia que crea o que di Feijóo", de quen lembrou que era alto cargo da Consellería de Sanidade nos anos noventa e "non sabía no ano 95 quen era Marcial Dorado". "Non se trata de dúas persoas que se van de paseo nun barco, trátase dun narco recoñecido e dun alto cargo de Sanidade", ilustrou.
"Ninguén pode seguir sendo presidente do Goberno galego con esta carga ás costas", dixo. Así, Pachi Vázquez, que cualificou "os feitos de extrema gravidade", preguntouse "de que falaron" Feijóo e Dorado "nesas viaxes a Andorra" e lembrou que "moita xente" en Vilagarcía "ía a Andorra e non precisamente a facer turismo" naquela época.
AGE
Tamén o portavoz Alternativa Galega de Esquerda (AGE), Xosé Manuel Beiras, reclamou que o presidente da Xunta, Alberto Núñez Feijóo, poña "o seu cargo a disposición da cámara de representantes", mentres que a viceportavoz, Yolanda Díaz, considerou que as fotos del co narcotraficante Marcial Dorado, nos anos 90 son "uns feitos gravísimos" que "merecen a reprobación política", é dicir, a "dimisión" do mandatario autonómico.
En rolda de prensa, Xosé Manuel Beiras considerou esta situación "patética e asquerosa" e xulgou que o comunicado emitido polo presidente da Xunta o domingo ao coñecer a información do xornal El País é propio "dun adolescente inmaturo do Opus Dei que foi cachado nas patacas".
BNG
Pola súa banda, o voceiro parlamentario do BNG, Francisco Jorquera, esixiu este luns a "dimisión inmediata" do presidente da Xunta, Alberto Núñez Feijóo, ao interpretar que esta é a única resposta "posible" tras constatarse "as súas relacións persoais cun capo da mafia do narcotráfico" e advertiu de que "rexenerar a democracia", unha expresión utilizada reiteradamente polo mandatario autonómico, esixe "medidas exemplarizantes".
Tras reiterar que "unha persoa que mantén este tipo de relacións é indigna de ser presidente de Galicia", subliñou que en calquera país "cunha democracia minimamente asentada" se dimite por feitos "de moita menor gravidade". "O Núñez Feijóo de entón é o mesmo Núñez Feijóo de agora, aínda que vendo o seu comunicado --o que emitiu o presidente tras coñecer a publicación das fotos-- parece que falamos de persoas distintas", criticou.
CxG
Tamén o Secretario Xeral de Compromiso por Galicia, Xoán Bascuas, manifestou este domingo que o Presidente da Xunta debe dar “explicacións máis contundentes” . Neste sentido, o lider da organización galeguista apunta a “de ser certo que Dorado era provedor do SERGAS cando Feijóo era Secretario Xeral da Consellería de Sandidade e Servizos Sociais”, o Presidente da Xunta “debe dar moitas máis explicacións”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.