O PP de Lugo celebra que o Congreso rexeitase o decreto de remanentes

O Partido Popular de Lugo enviou un comunicado no que celebra que o pleno do Congreso rexeitase convalidar o decreto lei que recolle o acordo coa Federación Española de Municipios e Provincias (FEMP) para a cesión ao Estado dos remanentes municipais e, en consecuencia, "a súa derrogación".

A presidenta provincial do partido, Elena Candia, en nome de todos os populares lucenses, mostra a súa satisfacción polo resultado, pois a medida era, esgrimiu, "un atentado e saqueo ás entidades locais".

Por este motivo, Candia lamenta que os deputados socialistas de Lugo na Cámara Baixa "volvesen preferir defender a Sánchez e non aos lucenses".

"Demostraron cales son as súas prioridades. Coñecen a situación da provincia e dos seus concellos, polo que votar a favor deste acordo é ser claramente cómprices do que ía ser o maior roubo nunca antes feito ás entidades locais", censurou.