O PSdeG afea a Feijóo non querer "dar a cara" polo caso Kitchen e pide exempleradidade ante "corrupción"
"É que Feijóo non leva anos no PP? É que non está na dirección do PP de forma continua?", preguntase Gonzalo Caballero. Barreiro (PP) defende a "honradez" de Rajoy, que ve "o mellor presidente que tivo España na época .
Por Europa Press / Redacción | SANTIAGO DE COMPOSTELA | 14/09/2020 | Actualizada ás 13:45
O secretario xeral do PSdeG, Gonzalo Caballero, afeou ao presidente da Xunta e número un dos populares galegos, Alberto Núñez Feijóo, que "non quere dar a cara" polo denominado 'caso Kitchen'.
Díxoo nunha rolda de prensa este luns despois de que Núñez Feijóo afirmase este domingo en Oviedo que "nin as épocas nin os feitos teñen que ver coa situación actual". Respecto diso, Caballero criticou que o PP "institucionalizou a corrupción a través da Gürtel" e denunciou que se tente "tapar de forma ilexítima e presuntamente ilegal a corrupción".
Así, lamentou que Feijóo diga que o 'caso Kitchen' "non ía co PP actual" e asegurou quedarse "estupefacto" ao escoitar as súas declaracións. "É que Feijóo non leva anos no PP? É que non está na dirección do PP de forma continua?", preguntouse, despois de incidir tamén en que o líder do PPdeG ten ao expresidente Mariano Rajoy como "referente fundamental".
Por iso, concluíu que "non quere dar a cara", tampouco "pola utilización perversa das institucións do estado a favor dos intereses de persoas como Rajoy". Ante isto, reclamou "políticas de exemplaridade" e "ser contundente", tanto "nas palabras" como en "os feitos", sen "consentir a corrupción".
BARREIRO DEFENDE A FEIJÓO
O portavoz adxunto do PP no Senado, José Manuel Barreiro, defendeu este luns que Mariano Rajoy "é o mellor presidente que tivo España na época democrática". Así o manifestou no marco da operación 'Kitchen', que investiga o suposto uso de recursos de Interior para favorecer intereses do PP cando Mariano Rajoy estaba á fronte do partido.
"Desde o meu punto de vista Mariano Rajoy é o mellor presidente que España tivo na época democrática e é así por moitas razóns, en primeiro lugar pola situación que lle tocou vivir que era unha situación francamente complexa e dentro dese contexto negativo, conseguiu evitar o rescate e conseguiu algo que agora se está destruíndo como é a recuperación económica e social de España", reivindicou.
