Balance exitoso da V edición do FIC Vía XIV de Verín
A participación do público nas actividades paralelas superou as 860 persoas, cifra que supón un aumento do 40% en relación ao ano pasado, e a cifra global de asistentes foi de 1.100 persoas.
Por X.M. Fernández | Verín | 17/09/2020 | Actualizada ás 09:30
O FIC Vía XIV, festival de curtas de Verin, optou este ano por cambiar de datas. Tendo que terse celebrado en decembro adiantouse a este mes de setembro e o resultado dálle a razón á organización. Segundo sinala o director do certame, Carlos Montero, o balance foi “moi exitoso e favorable para atraer novo público ás diferentes proxeccións e actividades paralelas propostas, que tiveron un marcado carácter local”.
En seis ocasións durante o transcurso do mesmo colgouse o cartel de completo e as estreas das pezas documentais “Entroidar” e “Hijas de Galicia, Macorinas” foron especialmente exitosas.
Máis de 860 persoas -un 40% máis que na edición anterior- participaron nas actividades paralelas propostas, e a cifra global de asistentes, contando as persoas que visionaron as curtas na pantalla instalada en García Barbón e a través de streaming, superou as 1.100.
Aínda así, por mor da pandemia, non se puido nesta ocasión desenvolver a actividade Cinema Marabillas, orientada aos cativos e cativas. A organización do certame, segundo expresa Montero, “confía en poder retomar a actividade o vindeiro mes de decembro, no propio Auditorio de Verín, sempre e cando as circunstancias sociosanitarias o permitan”.
PALMARÉS DA V EDICIÓN
O Premio á Mellor Curta na Categoría “Outra Mirada” foi para Bos, un traballo dirixido por Steffen Geypens. Jamila, unha curta sueca realizada por Sophie Vukovic, ergueuse co Premio á Mellor Curta na Categoría “Horizontes”. Por outra banda, Eco -do madrileño Aitor de Miguel- levou o Premio á Mellor Curta na Categoría “A Raia” e, finalmente, Je finirais en prison, de Alexandre Dostie, feita en Canadá, foi distinguida co Premio á Mellor Curta na Categoría “Nova”. O Premio do Público foi para Feitizo, unha curta dirixida polos mozos de Verín Álex González e Patricia Porto.
O xurado decidiu tamén outorgar unha mención especial, dentro da categoría A Raia, á curta Néstor, do portugués Joao González.
CAMIÑO DA VI EDICIÓN
“Os datos avalan o éxito e a consolidación do FIC na axenda cultural de Verín”, abondou Carlos Montero, quen sinala tamén que dende xa comezarase a pensar “en como articular a sexta edición do certame”, que se celebrará en 2021.
