A Xunta pon en marcha un comité de expertos que guiará a adaptación do sistema educativo á pandemia
Estará composto por 35 membros do ámbito educativo e sanitario, entre eles o doutor Ángel Carracedo e Ubaldo Rueda.
Por Europa Press / Redacción | Compostela | 20/09/2020 | Actualizada ás 20:25
O Comité Educativo encargado de velar pola adaptación e desenvolvemento do curso escolar 2020/21 no contexto de pandemia quedará constituído este luns, xornada na que, tras a súa publicación no Diario Oficial de Galicia (DOG), celebrarase a primeira reunión deste órgano composto por 35 persoas procedentes dos ámbitos educativo e sanitario.
O conselleiro de Cultura, Educación e Universidade, Román Rodríguez, presidirá a primeira reunión do comité. Farao de forma telemática, xa que desde o pasado venres garda corentena tras o positivo en covid-19 dun contacto próximo.
O comité terá entre as súas funcións a identificación e asesoramento das medidas organizativas e de xestión educativa nos distintos escenarios epidemiolóxicos que se vaian dando ao longo do curso, segundo informa a Consellería de Educación nun comunicado emitido este domingo.
O obxectivo é abordar os retos que se presentan este curso "con rigor científico e de forma colexiada desde perspectivas educativas complementarias", así como actuar de forma "coordinada" con outros órganos, como o Comité Clínico no que se adoptan as medidas da Xunta para facer fronte á pandemia.
Educación sinala que coa posta en marcha do Comité Educativo, a Xunta "ten practicamente implementadas as últimas medidas de adaptación do ensino á covid-19" despois da elaboración dos protocolos de comedores escolares, as medidas para alumnado con necesidades especiais e o reforzo de profesorado para os centros.
MEMBROS DO COMITÉ
Así as cousas, os 35 membros do comité, que se reunirá "coa periodicidade que a situación epidemiolóxica demande" proceden de distintos ámbitos: desde a administración, como o propio conselleiro e o seu equipo; o sanitario, representantes de equipos directivos de centros e departamentos de orientadores e, por último, tres persoas de "recoñecido prestixio".
Así o destaca a Xunta sobre a participación no comité do exdirector do Instituto Rosalía de Castro de Santiago Ubaldo Rueda, o catedrático de Medicina Legal da USC Ángel Carracedo e Vicente Docasar, catedrático de Francés no IES Daviña Rei Monforte e exportavoz de Educación no Parlamento de Galicia polo PSdeG. Tamén estarán docentes en representación de varios equipos directivos.
