Por E.P. | SANTIAGO DE COMPOSTELA | 18/10/2020 | Actualizada ás 14:38
A campaña turística da Xunta 'Elixe Galicia', dirixida a persoas de menos de 30 anos, a familias con fillos menores e a pensionistas maiores de 55, recibiu ata o momento case 2.000 solicitudes para optar ás viaxes ofertadas entre o 10 de marzo e o 15 de novembro de 2021.
O prazo para participar na segunda convocatoria deste programa permanecerá aberto ata o próximo 2 de novembro. Os interesados deberán solicitar praza a través de axencias de viaxes ou da sede electrónica da Administración galega e, en caso de ser beneficiados, terán que reservar a partir do mes de febreiro nun trámite para o que se terá en conta a orde de inscrición e os condicionantes económicos.
Todos os usuarios que obteñan praza, explica a Xunta, pagarán unha cantidade fixa correspondente a prezos de tempada baixa e dependendo do programa no que se incriban, mentres que o 40 por cento estará subvencionado con fondos públicos.
En total, hai catro programas diferentes: vacacións en zonas costeiras, rutas de patrimonio histórico e cultural; rutas de natureza e montaña; e estancias en balnearios. As viaxes teñen unha duración de tres a cinco días, moitos deles en fin de semana.
Aínda que inicialmente a Xunta previra algo máis de 6.500 prazas para esta segunda edición de 'Elixe Galicia', a previsión é que poida dispor de máis de 10.000, xa que se lle sumarán as que non se cheguen a comercializar este ano.
Así mesmo, o Goberno galego asegura que a campaña conta con "un completo e moi estrito" protocolo contra a COVID-19, co obxectivo de "garantir a higienización, limpeza e seguridade sanitaria para os seus beneficiarios".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.