Facua Galicia reclama inspeccións sanitarias en festivais e food trucks

A organización de consumidores Facua Galicia reclamou á Consellería de Sanidade "que realice inspeccións sanitarias a todos os locais, food trucks ou puntos itinerantes que vendan comida nos recintos onde se celebran festivais de música ou outros eventos culturais". Pídeo, sinala nun comunicado, "a fin de previr posibles intoxicacións alimentarias como a ocorrida o pasado fin de semana en Oza-Cesuras (A Coruña)", sinala sobre o brote de salmonelosis.

Por outra banda, indica que as persoas afectadas teñen dereito a reclamar indemnizacións. "A lexislación establece o dereito dos consumidores a reclamalas tanto polos días incapacitantes como non incapacitantes nos que sufrisen danos na súa saúde, estivesen ou non hospitalizados". "Non é necesario que exista unha baixa laboral, é suficiente con acreditar, co debido informe médico, que tipo de prexuízos se sufriron". "Tamén sería conveniente achegar o ticket de consumir ese produto ou que o informe médico relacione o brote de salmonella coa inxesta do mesmo", engade.

Food Truck | Fonte: foodtruckya.com