O alcalde de Santiago acata as restricións en Santiago pero di que "xeran contradicións"
Pide a Xunta e Estado que palíen as consecuencias económicas e di que o aumento das multas xa funcionan como "disuasorias" de festas.
Por Europa Press / Redacción | SANTIAGO DE COMPOSTELA | 21/10/2020 | Actualizada ás 13:44
O alcalde de Santiago de Compostela, Xosé Sánchez Bugallo, sostivo que "non é fácil de aplicar" a limitación de reunións aos convivientes e considerou que é un tema que "a ninguén se lle escapa que ten as súas dificultades e xera as súas contradicións". "Pero á parte diso, que é a que vexo máis complexa, ao resto non lle vexo complexidade", sinalou, tras asegurar que, de todos os xeitos, non "quere" facer "valoracións": "adóptaas o comité clínico e o que temos que facer é acatalas e polas en vigor".
En declaracións aos medios a unhas horas de que entre en vigor o nivel 3 de restricións para a capital de Galicia, xunto á localidade de O Milladoiro --perimetralmente ligado a Santiago aínda que pertence ao concello de Ames--, Bugallo manifestou que a el non lle corresponde "valorar" as "decisións do comité clínico", senón que espera que "acerte" e expresa a súa intención de "colaborar para que as medidas saian adiante".
Con todo, Bugallo, que dixo que no Concello eran "conscientes" de que había que "adoptar medidas adicionais" debido á evolución da pandemia, admitiu tamén que pór en marcha medidas como restrinxir a relación aos convivientes "ten as súas dificultades e xera contradicións".
O alcalde compostelán tamén pediu esperar a coñecer a publicación do decreto no Diario Oficial de Galicia (DOG), nas próximas horas, posto que hai cuestións que, neste momento, el tampouco sabe responder. Así, puxo o exemplo de que descoñece se ten que pechar os parques infantís, como ocorreu durante o confinamento e ata o fin da desescalada, ou as canchas deportivas ao aire libre.
Na súa intervención, o rexedor compostelán lembrou que aínda que Santiago se mantivo nuns contaxios de 170-180, no últimos dez días pasouse a 233 e actualmente son 360 casos, "unha subida significativa que require e xustifica que se tomen medidas".
VIXILANCIA
Preguntado por se se vai a reforzar a vixilancia, Bugallo sostivo que o Concello "ten os medios que ten" e xa estableceu medidas para asumir as novas competencias. "Non temos moitos medios para poder ampliar o servizo que prestamos", dixo, sobre as "novas funcións", que "terán que analizar entre hoxe e mañá" para ver que outras cuestións adicionais hai que afrontar.
"Hai decisións que, cando coñezamos o texto íntegro, teremos que avaliar coa realidade concreta, que posibilidades reais de control e de garantir a normativa sanitaria (temos)", salientou Bugallo, quen lembrou que algunhas desas medidas adicionais foi a "flexibilización" das terrazas, que foi aprobado este martes pola comisión do centro histórico.
FESTAS EN PISOS
Doutra banda, asegurou que as sancións anunciadas polo Concello de Santiago por festas en pisos e que "se están aplicando neste momento" xa "empezan a ser disuasorias".
Así, ao ser preguntado pola posibilidade de que se cobre unha entrada de cinco euros, lembrou que para compensar unha multa de 750 euros tería que haber 150 persoas nun piso. "As sancións empezan a ser disuasorias", sentenciou.
