O catedrático Carlos Villanueva doa os 6.000 euros do XXIV Premio Compostela á investigación contra a covid na USC
En concreto, será a iniciativa de micromecenazgo Sumo Valor da USC a que reciba o importe do premio, de 6.000 euros, que irá destinada a labores de investigación dentro da liña de loita contra a covid-19.
Por Europa Press / Redacción | SANTIAGO DE COMPOSTELA | 27/10/2020 | Actualizada ás 19:24
O galardoado co XXIV Premio Internacional Grupo Compostela-Xunta de Galicia, o catedrático emérito Carlos Villanueva Abelairas, doará a contía deste galardón á investigación coa covid-19 na Universidade de Santiago de Compostela (USC).
Así o comunicou este martes nun acto celebrado no salón reitoral da universidade compostelá, ao que asistiron o reitor da USC, Antonio López; a secretaria executiva do Grupo Compostela Universidades, María Teresa Carballeira Rivera, e o secretario xeral de Universidades da Xunta, José Alberto Díez de Castro.
No acto privado e do que informou a Xunta nun comunicado, Villanueva explicou que non dubidou á hora de decidir cara a onde orientar a doazón do premio xa que toda a súa traxectoria académica estivo vinculada á institución que a recibirá.
En concreto, será a iniciativa de micromecenazgo Sumo Valor da USC a que reciba o importe do premio, de 6.000 euros, que irá destinada a labores de investigación dentro da liña de loita contra a covid-19.
"Esta iniciativa compendia o que foi a miña vida profesional e os temas nos que me gustaría seguir traballando e apoiando, agora como catedrático emérito. Máxime en tempos de dificultades para todos", manifestou en referencia a Sumo Valor.
Respecto da doazón, a secretaria executiva do Grupo Compostela de Universidades (GCU) expresou que "satisfai dobremente" ao GCU xa que "á distinción da excelencia científica do profesor Villanueva súmase agora o recoñecemento da bonhomía, demostrada por premiar con este xesto altruísta".
Nesta liña pronunciouse o reitor da USC, Antonio López, ao considerar que esta distinción engade ás virtudes do académico a "xenerosidade" e contribúe a reforzar a idea da importancia papel da ciencia e do coñecemento para superar estes momentos.
Carlos Villanueva Abelairas é catedrático de Música da Universidade de Santiago de Compostela desde o ano 2000 e catedrático emérito desde 2020. As súas primeiras liñas de investigación céntranse principalmente na interpretación da música antiga e os instrumentos medievais, e máis adiante na crítica musical, a música española e latinoamericana do século XX, as músicas e exilios, así como a música e as identidades.
As súas publicacións relacionadas cos instrumentos do Pórtico da Gloria da Catedral de Santiago son referentes na musicologxa internacional e foi codirector do proxecto de construción dos instrumentos deste espazo, patrocinado pola Fundación Barrié da Maza e desenvolvido entre 1990 e 1994.
Co obxectivo de dar difusión internacional a este proxecto, levou a cabo viras por todo o mundo e realizou diversas gravacións co Grupo de Cámara da USC. Na súa extensa produción literaria, destacan as obras 'O Códice Calixtino e a música do seu tempo', 'Polifonía xacobea. As panxoliñas ao Apóstolo de José de Vaquedano', 'O son da pedra (Encontro sobre instrumentos no Camiño de Santiago)', entre outros.
