A enfermidade renal medra en Galicia e case 4.000 persoas precisan diálese ou transplante

A Enfermidade Renal Crónica (ERC), lonxe de parar a súa progresión, continúa crecendo un ano máis en Galicia. No ano 2019 situouse en 1.367 persoas por millón de poboación no conxunto do Estado, segundo datos do Rexistro Español de Enfermos Renais (REER) que foron presentado no 50º Congreso da Sociedade Española de Nefroloxía celebrado esta fin de semana. 

Deste rexistro despréndese que uns sete millóns de persoas teñen Enfermidade Renal Crónica en España, das que máis de 64.000 necesitan diálese ou transplante. No último ano tamén se experimentou un aumento da incidencia (novos casos), que pasaron das 147,3 persoas por millón de poboación ás 151,9, un 2,6% máis. 

No caso de Galicia, o país empeora estas cifras en prevalencia situándose en 1.468 persoas por millón de poboación, fronte aos 1.367 pmp da media estatal, cun crecemento do 5% con respecto a 2018. Deste xeito, trátase dunha das comunidades con maior taxa de prevalencia de ERC, por detrás de Canarias, Comunidade Valenciana e Cataluña. 

Durante a celebración do seu 50º Congreso anual, a S.E.N. repasou todos os datos de persoas que padecen Enfermidade Renal Crónica, que ten como principais causantes a diabetes e as enfermidades cardiovasculares, que requiren que os seus pacientes sexan sometidos a diáleses ou transplante. 

TRANSPLANTES

En canto ao transplante, o informe sinala que 55% dos pacientes en TRS están trasplantados, un máximo histórico que responde o crecemento sostido do número de transplantes, superando en 2019 os 3.400 enxertos, cunha taxa de case 73 pmp, a máis elevada do mundo. 

Pola súa banda, a mortalidade da Enfermidade Renal Crónica en TRS experimentou un lixeiro descenso ao se situar no 7,8%, cun índice moito máis baixo nos pacientes trasplantados (2,4%), inferior en todos os grupos de idade. A infección e a patoloxía cardiovascular son as principais causantes de falecemento en todas as modalidades de TRS. Así mesmo, o cancro como causa de morte é máis prevalente nos pacientes. 

VIDA SAUDABLE

O aumento da incidencia da ERC relaciónase con cuestións como o aumento da esperanza de ida e o envellecemento da poboación, pero principalmente con factores de risco como a diabetes e a enfermidade cardiovascular (responsables de máis do 40% por cento dos novos casos), a obesidade, a hipertensión arterial ou o tabaquismo. Por iso é polo que os nefrólogos fan un chamamento sobre a importancia da prevención e a promoción da saúde renal, adoptando hábitos de vida saudables como medida fundamental para frear o avance dunha patoloxía que xa se coñece como "a epidemia silenciosa", debido a que os seus síntomas son pouco reconocibles nos seus estadios iniciais, o que en definitiva dificulta o seu diagnóstico precoz e o seu tratamento.