Por E.P. | Santiago de Compostela | 12/11/2020 | Actualizada ás 18:27
O secretario xeral do PSdeG, Gonzalo Caballero, evitou este xoves entrar publicamente na polémica co goberno municipal A Coruña tras a destitución da secretaria da agrupación local ao asegurar que ditas tarefas "están delegadas noutros compañeiros".
Tras participar nun acto en Ferrol, o xefe de filas dos socialistas galegos asegura estar "dedicado plenamente a atender ás mellores políticas ante unha crise de tanta gravidade", en alusión á pandemia da covid-19.
Por iso, preguntado sobre o conflito tras o cesamento de Eva Martínez Acón --próxima á súa dirección-- por parte da alcaldesa Inés Rey, afirmou que "outras cuestións" están "delegadas noutros compañeiros, neste caso concreto no vicesecretario xeral, que ademais é militante desa agrupación da Coruña, Pablo Arangüena".
Precisamente, na xornada do mércores, o número dous do PSdeG, Pablo Arangüena, remitiu unha carta á militancia coruñesa na que mostraba o seu apoio á secretaria local cesada e reclamaba que a alcaldesa e outros edís da cidade procedesen ao pago das cotas debidas ao partido desde "xuño de 2019".
Caballero non quixo entrar a valorar o asunto ao considerar que "a cidadanía está preocupada" pola crise da covid-19. "Eu entendo que estes temas tamén teñen a súa importancia, pero volvo remitirme ao vicesecretario xeral, que é militante da Coruña e coñece ben o tema", afirmou.
CONFLITO E CRUZAMENTO DE CARTAS
O pasado martes a alcaldesa da Coruña, Inés Rey, destituíu á secretaria local do partido, Eva Martínez Acón, á que acusou de "abandono de funcións" e "obstrucionismo" á acción do goberno municipal.
Pola súa banda, edil cesada atribuíu o seu cesamento ao feito de reclamar á alcaldesa e ao grupo municipal o pago de cotas debidas ao partido.
A decisión de Rey prodúcese nun contexto de diferenzas entre partidarios de Gonzalo Caballero e próximos á dirección provincial do PSOE que se remonta xa a antes das eleccións municipais. Así, mentres que Martínez Acón é un dos principais apoios do actual secretario xeral do PSdeG na Coruña, a rexedora é próxima á dirección provincial do partido, cuxo responsable de Organización, José Manuel Lage Tuñas, forma parte do goberno local.
Estas discrepancias xa se deixaron sentir na configuración da lista para os comicios locais por parte do PSOE coruñés. En concreto, a rexedora, que se impuxo nas primarias, foi reticente á incorporación de Eva Martínez Acón, que fora a máis votada pola asemblea local. Con todo, finalmente, esta ocupou o número cinco da candidatura.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.