Por E.P. | A CORUÑA | 18/11/2020 | Actualizada ás 13:17
A Asociación de Hostalaría da Coruña e o Concello herculino uníronse para organizar este venres, día 20, unha gran recollida de alimentos na praza de María Pita. Os hostaleiros achegarán aqueles produtos "sobrantes" que, como sinalou a alcaldesa, Inés Rey, "por desgraza" non "poden cociñar estas semanas de peche".
Na presentación da iniciativa, o presidente da entidade, Héctor Cañete, explicou que os hostaleiros teñen "moito produto que se pode perder" e que, por tanto, "o mellor que se pode facer era isto". As doazóns destinaranse ao Banco de Alimentos da Coruña.
Deste xeito, desde as 10,30 ata as 14,30 horas haberá carpas na praza de María Pita para que a cidadanía achegue "leite, galletas, conservas e legumes" que serán transportadas de maneira altruísta por distintas empresas, tal e como informou Rey. Ás 17,00 horas farase unha cadea humana ata a Cociña Económica, "outro punto simbólico de solidariedade".
"Nesta loita por sobrevivir estamos todos xuntos. O máis importante é que ninguén quede atrás", apuntou a rexedora coruñesa, que defendeu que a hostalaría é "parte da identidade coruñesa". Por iso, comentou que o Concello "non quere que ningún establecemento peche para sempre" e por iso axuda a 4.000 empresarios a través do plan Presco e non cobrará a taxa de terrazas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.