Por E.P. | SANTIAGO DE COMPOSTELA | 02/12/2020 | Actualizada ás 18:06
O alcalde de Ferrol, Ángel Mato (PSOE), reclamou que se tomen "medidas de carácter urxente" ante a baixa produción marisqueira que padece a ría de Ferrol.
Este mércores, o rexedor manifestou que a situación é "preocupante" porque do sector marisqueiro "viven 600 familias de maneira directa", polo que avanzou o concello realizará "un seguimento ao acordo alcanzado por unanimidade no Parlamento de Galicia" para actuar sobre a ría ferrolá.
"Dirixirémonos ao Goberno central para trasladarlles de que se realice un estudo integral da nosa ría para coñecer que é o que está a prexudicar a produción marisqueira", sinalou Matogueira.
Estas palabras pronunciounas o alcalde tras manter no concello un encontro cos patróns maiores das confrarías de Ferrol, Barallobre, en Fene, e Mugardos; ao que tamén asistiu o rexedor de Fene, Juventino Trigo (BNG).
Alí, en declaracións aos medios, Mato destacou que o marisqueo é "un sector fundamental para toda a comarca" e que por iso "as medidas non poden agardar".
ELABORACIÓN DUN ESTUDO
"Recoñecemos que é urxente actuar e buscar unha solución para os problemas que ten a ría de Ferrol e os seus bancos marisqueiros", destacou, pola súa banda, o rexedor fenés, Juventino Trigo.
Así as cousas, cre necesario que os orzamentos autonómicos que están tramitación nestes momentos na Cámara galega deben contar con "algunha partida" para realizar os estudos necesarios na ría.
"Estamos a ter problemas en toda a comarca de Ferrol", declarou antes de expresar o seu apoio ás mobilizacións convocadas polo sector.
Unhas protestas que empezarán este venres cunha caravana que partirá ás 12,45 horas desde A Malata e percorrerá todos os municipios da ría, discorrendo por Ferrol, Narón, Neda, Fene e Mugardos. Os patróns maiores das confrarías denunciaron en reiteradas ocasións os baixos niveis de produción, en torno ao 10% do que era hai uns anos.
"Estamos ante unha situación na práctica de colapso da ría e que ameaza con expulsar do sector a un elevado número de persoas", remarcan desde as confrarías, que pon no foco na situación da ameixa na ría de Ferrol.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.