Evacuadas nove persoas de dous edificios de Ourense por un incendio orixinado nun transformador

Nove veciños tiveron que ser evacuados por seguridade de dous edificios da cidade de Ourense por un incendio orixinado nun transformador de electricidade.

Segundo informa o 112 Galicia, ocorreu preto das 11,00 horas deste venres na avenida das Caldas. Foron os voluntarios de Protección Civil da urbe os que avisaron á central de emerxencias.

A partir de entón, o 112 activou un operativo no que participaron os axentes da Policía Local, ademais dos bombeiros de Ourense.

En total, foron nove veciños os que tiveron que abandonar as súas casas por precaución mentres os bombeiros sufocaban este incendio que afectaba a un transformador da fachada do edificio.

Lugar onde se produciu o incendio | Fonte: Google Maps.