Por Galicia Confidencial | SANTIAGO DE COMPOSTELA | 09/12/2020 | Actualizada ás 13:21
Novo episodio na polémica das granxas de visóns. O ollo público está posto nestas explotacións logo de que saltase á actualidade que estes pequenos animais poden xerar unha mutación do virus da covid-19 que podería deixar sen efecto o avance das vacinas. Neste contexto, as asociacións ecoloxistas asentadas en Galicia aproveitaron para poñer sobre a mesa a alta concentración de granxas de visóns na comunidade; unha cuestión que vén de subir de nivel logo de que Adega acusara á Xunta de autorizar “ilegalmente” algunhas destas granxas.
En concreto, e segundo datos que manexa a Asociación, “4 das 26” explotacións actualmente en funcionamento en Galicia “poden ser ilegais ao telas a Xunta autorizado despois de marzo de 2016”. O incumprimento viría dado porque, din os ecoloxisas, “nesta data o Supremo prohibiu novas instalacións e ampliacións en todo o territorio do Estado”. As catro granxas en cuestión estarían situadas en Abegondo, A Baña, Oza-Cesuras e Agolada.
O descubrimento vén de ser realizado logo de que o goberno de Núñez Feijóo, ante a presión destes grupos ecoloxistas, decidira achegar información sobre o espallamento destas granxas na comunidade, máxime “ante as evidencias de que estas instalacións poden contribuír á expansión de novas cepas de COVID-19, tal como xa aconteceu en Europa”. Así apreciou o colectivo ADEGA que 4 das instalacións teñen data de alta posterior a marzo de 2016, é dicir, máis alá da nomeada sentencia do Tribunal Supremo.
O fallo deste tribunal anulaba parte dun Real Decreto orientado a regular o catálogo de especies exóticas invasoras. En concreto, o apartado eliminado facía referencia á posibilidade “excepcional” de autorizar o aproveitamento gandeiro de especies invasoras. Este punto anulado implicaba que “non se poderían abrir novas granxas de visón americano nin ampliar as existentes” nos territorios nos que está presente o visón europeo. Porén, en Galicia a especie europea non está presente, explican dende ADEGA, “polo que antes deste fallo podían instalarse novas granxas e ampliar as xa operativas”.
A cuestión é que, coa derrogación deste apartado, “o Supremo eliminou todas as excepcións para o aproveitamento de calquera especie invasora en todo territorio do Estado”. Esta base incluiría o propio visón americano, polo que as granxas abertas ou ampliadas logo de marzo de 2016 serían ilegais. Dende a plataforma deixan constancia de que, por riba, a Xunta chegou a subvencionar con ata 24.750€ a explotación da Baña en 2018.
40 POSTOS DE TRABALLO
Fronte a estas circunstancias, a posición da plataforma pasa por pedir o peche “definitivo” destas instalacións “ao igual que está a acontecer en Europa”. Segundo destacan, “o impacto económico non compensa en absoluto o mantemento dunha actividade de tan alto risco biolóxico e de saúde”. “En Dinamarca pecháronse todas as granxas, unhas 1200, que daban emprego a 1800 persoas. Seguindo esta proporción, as 26 granxas galegas manterían uns 40 postos de traballo”, argumentan.
“Se a Xunta teima en manter abertas estas instalacións, ademais de continuar desobedecendo ao Supremo (o que podería derivar en responsabilidades penais)”, discorren, “amosaría outra volta que para a Feijóo o beneficio empresarial está por riba da saúde pública e mesmo da legalidade”. ADEGA lanza unha última cuestión: “de quen serán as responsabilidades se nalgunha das granxas en situación ilegal se producen contaxios co COVID-19 ou aparecen novas cepas?”.
RESPOSTA DA XUNTA
Pola súa banda, a Consellería do Medio Rural, nun comunicado remitido ao Galicia Confidencial destaca que a redacción en vigor deste Real Decreto permite autorizar novas explotacións de animais incluídos no catálogo, con medidas precautorias suficientes, e tras unha análise de riscos favorable, en relación aos posibles escapes, liberacións e vertidos que puideran existir.
Por este motivo, as Consellerías do Medio Rural e de Medio Ambiente estableceron no seu día un protocolo de autorización consensuado no que se fixaban as condicións de seguridade e os criterios que deben cumprir este tipo de granxas. "Así, no caso de todas granxas de visóns rexistradas con posterioridade a esta sentenza, realizouse previamente por parte da Xunta unha análise de riscos que se resolveu con informe favorable", aclaran fontes deste departamento.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.