Cachan a un neno de 9 anos conducindo unha furgoneta co seu pai de copiloto
Aconteceu en San Cibrao das Viñas, onde o proxenitor está sendo investigado.
Por Europa Press / Redacción | SANTIAGO DE COMPOSTELA | 14/12/2020 | Actualizada ás 12:31
Axentes da Garda Civil de Tráfico interceptaron o pasado venres unha furgoneta conducida por un neno de nove anos en San Cibrao das Viñas. O pai, que viaxaba no asento do copiloto, tivo que declarar en calidade de investigado por un delito contra a seguridade viaria.
Segundo informa o Instituto Armado, ocorreu sobre as 22,00 horas da noite no quilómetro 0,100 da estrada que une as localidades de Carballeira e A Mioteira. Os axentes observaron unha furgoneta Peugeot Expert que circulaba por esa vía aberta ao tráfico e que, aparentemente, estaba conducida por unha persoa que podería tratarse dun neno.
Nese momento, a Garda Civil deulle o alto e comprobou que o condutor tiña nove anos de idade e que viaxaba acompañado do seu pai, que ocupaba o asento dianteiro dereito.
Por mor destes feitos, a Benemérita procedeu a tomar declaración ao pai en calidade de investigado como presunto autor dun delito contra a seguridade viaria, posto que o menor, dada a súa curta idade e de acordo co vixente Código Penal, é inimputable antes dos 14 anos.
