Por Galicia Confidencial | SANTIAGO DE COMPOSTELA | 24/12/2020 | Actualizada ás 18:00
Repítese o caso dun golpe xudicial contra un concello galego pola situación laboral dos seus traballadores. O último episodio desta longa listaxe vén de ter lugar no municipio ourensán de Avión, onde o consistorio vén de ser condenado por “trato discriminatorio” aos traballadores do Grupo de Emerxencias Supramunicipal. Así o sinala a CNT, que estivo implicada no proceso legal que vén de resolverse de xeito favorable para as demandas dos traballadores.
A “discriminación" acreditada polo Xulgado de Ourense radicou en que, en palabras do sindicato, o Concello non aboada uns trienios a todo o persoal do grupo de emerxencias, senón só a unha parte. A suba salarial, explican dende a formación sindical, “comezará a ser abonada dende a próxima nómina”. Nela irán recollidas tamén os atrasos endebedados, xa que a sentencia conta con carácter retroactivo.
O fallo desta semana únese así ao litixio legal do pasado mes de marzo, no que o Concello se viu obrigado a facer fixos aos traballadores do Grupo de Emerxencias Supramunicipal. Segundo a CNT, a sentencia serviu para demostrar “a fraude na contratación pública destes empregados do sector de emerxencia”. O sindicato asegura que dende “o consistorio parecen empeñados en seguir dilapidando os fondos públicos no pagamento dun Gabinete de avogados para non recoñecer aos traballadores e traballadoras o mínimo que lles corresponde de xeito legal”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.