O Tribunal de Cuentas investigará as medidas adoptadas por organismos públicos fronte á Covid
Fiscalizará a xestión nas residencias de maiores, así como os Expedientes de Regulación Temporal de Emprego (ERTE).
Por Europa Press / Redacción | MADRID | 07/01/2021 | Actualizada ás 12:04
O Tribunal de Cuentas ten previsto fiscalizar durante este recentemente estreado 2021 o groso das medidas adoptadas polos organismos públicos fronte á pandemia do coronavirus durante o estado de alarma e as relativas á reestruturación económica aplicadas con posterioridade.
O Tribunal de Cuentas informa de que o programa de fiscalizacións para este ano, aprobado polo Pleno o pasado 22 de decembro, contempla a revisión dos contratos de emerxencia acordados para facer fronte á emerxencia sanitaria tanto por parte dos ministerios como das comunidades autónomas, concellos ou o sector público empresarial.
Nun comunicado, recollido por Europa Press, o organismo que dirixe María José de la Fuente tamén apunta que fiscalizará a xestión nas residencias de maiores, así como os Expedientes de Regulación Temporal de Emprego (ERTE) tramitados durante a crise sanitaria.
O programa tamén inclúe a análise e estudo da xestión do transporte de viaxeiros, os sistemas de información saúde pública, o grao de execución dos fondos estruturais, as axudas a entidades para a fabricación de dispositivos médicos, equipos de protección persoal e produtos considerados de emerxencia ou a implementación do teletrabajo.
