A covid dispárase en Galicia: 1.300 casos activos na fin de semana e 10 novos pacientes en UCI
Os novos positivos seguen por encima dos 600 e hai case 50 novos hospitalizados. E iso que a Xunta realizou menos PCRs.
Por Europa Press / Redacción | Santiago de Compostela | 11/01/2021 | Actualizada ás 11:40
O avance da pandemia do coronavirus en Galicia provocou nas últimas horas un importante aumento da presión hospitalaria. De acordo cos datos feitos públicos na mañá deste luns pola Consellería de Sanidade, a Comunidade galega ten 468 ingresados por covid-19, 47 máis que un día atrás.
Este aumento é notable tanto nas hospitalizacións en planta, que alcanzan a cifra de 397 --37 máis--, como nas unidades de coidados intensivos (UCI), que contan con 71 pacientes covid --10 máis que nos datos do domingo--. De feito, todas as áreas sanitarias experimentaron unha subida dos ingresos. Á cabeza volveuse a situar a da Coruña-Cee, con 114 (+13), dos que 21 (+3) están en UCI. A segunda é a de Santiago-Barbanza, con 109 hospitalizados (+4), oito deles (+1) en críticos.
A área sanitaria de Vigo creceu en catro ingresados nas últimas horas, ata alcanzar os 61 en total, dos que 19 están en UCI, tras subir en tres. Á viguesa séguelle de preto a área de Ferrol, que en só un día aumentou en 14, ata os 60 hospitalizados covid, seis deles --tres máis-- en coidados intensivos.
As de menor presión seguen sendo as áreas sanitarias de Pontevedra-O Salnés, Ourense-Verín-O Barco de Valdeorras e Lugo-A Mariña-Monforte. En canto á pontevedresa, conta con 55 ingresados, cinco máis, pero este luns notifica 11 en UCI, un menos.
Tamén subiron en cinco os hospitalizados por covid na área ourensá, ata os 45 en total, aínda que as unidades de críticos mantéñense en tres. Finalmente, Lugo-A Mariña-Monforte ten 24 (+2), tres deles en UCI (+1).
CONTAXIOS E POSITIVIDADE
Á parte deste importante aumento da presión hospitalaria en Galicia, os novos casos de covid-19 detectados nun día por PCR mantéñense por encima dos 600. Concretamente, rexistráronse 627 novas infeccións, aínda que é un descenso con respecto ás 661 do domingo e ás 798 do sábado --algunhas fontes falan de case 900' e case un milleiro, respectivamente--, que supuxo a marca de toda a pandemia na Comunidade.
No entanto, hai que relacionar a baixada dos casos detectados coa diminución no número de probas realizadas. Así, ata o momento o Servizo Galego de Sáude (Sergas) practicou 1.184.921 PCR, o que implica que nas últimas 24 horas fixéronse 8.049, ao redor de 800 menos que o día anterior.
Ademais, a taxa de positividade aumentou lixeiramente na última xornada, ata o 7,9%, o que implica que Galicia continúa por encima do 5% que marca a Organización Mundial da Saúde (OMS) para dar por controlada a pandemia. De feito, non baixa dese limiar desde o 24 de decembro.
Tan só as áreas sanitarias de Vigo (3,5%) e Santiago (4,2%) están por baixo dese 5%, mentres a de Lugo supéraa lixeiramente (6%). En canto ao resto, sitúanse bastante por encima: Ourense (9,3%), A Coruña (13,9%), Ferrol (16,3%) e Pontevedra (19,8%).
A CORUÑA E VIGO, Á CABEZA EN POSITIVOS
A área sanitaria da Coruña-Cee volveu a ser, nos datos de Sanidade deste luns, a que notifica máis novos positivos por PCR, cun total de 151, aínda que supón baixar en 26 con respecto ao día anterior. Tamén descenderon as infeccións detectadas nun día en Vigo, ata as 111 (-22), aínda que continúa como a segunda con máis contaxios. En terceiro lugar sitúase Ourense-Verín-O Barco de Valdeorras, cun lixeiro repunte ata os 89 novos positivos (+1); e en cuarto está Ferrol, onde se dispararon os contagios diarios ata 86 (+25).
Entre as zonas con menos positivos nos datos deste luns figura a de Santiago-Barbanza, que notificou 74 infeccións tras un descenso de 14. Pontevedra-O Salnés sumou 66 positivos, unha repunta de 23 con respecto aos notificados o domingo, mentres que Lugo-A Mariña-Monforte é de nova a área sanitaria con menos contaxios, con 50 (-21).
OS CASOS ACTIVOS DISPÁRANSE
Con todo, os casos activos de covid-19 --é dicir, as persoas que nestes momentos padecen a enfermidade-- disparáronse en 455 nas últimas 24 horas, ata alcanzar a cifra de 8.250 pacientes en total. Cabe destacar que o venres eran 6.889, polo que nun só fin de semana creceron en máis de 1.300.
Neste sentido, tamén a área da Coruña-Cee sitúase á cabeza, con 1.944 casos activos este luns tras subir en 113 nun só día. En segundo lugar continúa Santiago-Barbanza, con 1.679 pacientes de coronavirus, 37 máis. Na de Vigo, o total de enfermos de covid sitúase este luns en 1.484, un aumento de 87 nun día, á vez que Ourense-Verín-O Barco superou o milleiro tras un ascenso de 93, ata o total de 1.040 pacientes.
Por baixo están, aínda que tamén aumentaron, as áreas sanitarias de Lugo-A Mariña-Monforte, con 778 (+27); Pontevedra-O Salnés, con 758 (+22); e Ferrol, con 567 (+76).
