A Xunta repartirá 800.000 euros por sacrificio de animais
Poderán acceder a estas axudas dende o 14 de xaneiro ata o 30 de novembro aquelas explotacións que estean correctamente inscritas no rexistro xeral de explotacións gandeiras.
- Piden o peche de granxas de visóns por ser unha especie invasora que agrava os contaxios de COVID-19
Por Europa Press / Redacción | SANTIAGO DE COMPOSTELA | 13/01/2021 | Actualizada ás 13:22
O Diario Oficial de Galicia (DOG) publicou o 13 de xaneiro a orde da Consellería de Medio Rural que regula neste 2021 a concesión de indemnizacións polo sacrificio obrigatorio ou morte de animais, pola destrución de produtos, en execución de programas e actuacións oficiais de vixilancia, loita, control e erradicación de enfermidades.
En concreto, o orzamento da convocatoria para este exercicio ascende aos 800.000 euros e poderán beneficiarse destas axudas os titulares con gando vacún, ovino ou caprino que deba sacrificarse por padecer ou convivir con reses afectadas pola tuberculose, brucelose, leucosis ou lingua azul.
Tamén aqueles con animais sacrificados, mortos ou destruídos por encefalopatías esponxiformes transmisibles, os que teñan aves sacrificadas dentro dos programas nacionais de control de salmonela, por un foco de influencia aviaria ou por enfermidade de Newcastle, e os que teñan porcos sacrificados ou mortos por peste porcina.
A maiores, poderá indemnizarse a morte ou sacrificio de animais como consecuencia dunha resolución ou de actuacións sanitarias oficiais impostas pola autoridade competente, así como por tratamentos e manipulacións preventivas ou con fins de diagnóstico.
Para ter dereito a estas axudas é imprescindible que a explotación estea correctamente inscrita no rexistro xeral de explotacións gandeiras e cumprir a normativa en vigor sobre sanidade e identificación animal, movemento pecuario, benestar e alimentaciónanimal.
Tamén será de obrigado cumprimento estar ao día dos programas nacionais de vixilancia, loita, control e erradicación de enfermidades dos animais e que sexa efectivo o sacrificio obrigatorio ordenado pola Consellería do Medio Rural.
O prazo de presentación das solicitudes prolongarase desde o próximo 14 de xaneiro ata o 30 de novembro. Os órganos xestores tramitarán, ademais das indemnizacións correspondentes a 2021, todas as peticións pendentes do exercicio anterior.
