O alcalde de Arteixo avisa de que a situación no concello é "extremadamente preocupante"

O alcalde de Arteixo, Carlos Calvelo, admitiu este martes que a situación da covid-19 no concello é "extremadamente preocupante" e instou aos veciños a "facer un esforzo" no cumprimento das medidas para baixar a incidencia. Así o explicou despois de que o comité clínico de expertos que asesora á Xunta determinarse medidas especiais para este municipio, xunto con Viveiro e Xinzo, que pasan polo peche total da hostalaría ao público e a suspensión de actividades non esenciais.

Carlos Calvelo lembrou que o 28 de decembro o concello tiña 31 casos activos e uns 90 casos por 100.000 habitantes e só 20 días despois, rexistra máis de 460 casos e unha incidencia próxima aos 1.400 casos a 14 días.

Por iso, ante este "incremento exponencial" dos datos, o comité clínico decidiu elevar as restricións, que o rexedor instou a "acatar" para baixar os índices. "É necesaria a concienciación aos veciños para que extremen ao máximo as medidas e eviten aglomeracións", explicou.

O alcalde de Arteixo atribúe boa parte do incremento de casos desde o 28 de decembro ao "efecto do Nadal" e confía en que o resultado das medidas poida verse nunha ou dúas semanas.

Os contaxios, explicou Carlos Calvelo, están "moi diseminados" polo municipio, aínda que hai constancia de "unidades familiares cunha cantidade importante dos seus membros contaxiados" --ata 15 nunha mesma familia, precisou--.

HOSTALEIROS

Pola súa banda, os hostaleiros e comerciantes de Arteixo aseguraron este martes que as novas medidas restritivas son "un mazazo" para a súa actividade e confiaron en que "veñan acompañadas de axudas por parte da Administración.

A través dun comunicado, a dirección de Arteixo Centro Comercial Aberto explica que o peche da hostalaría "supón un terceiro parón para a economía local en menos dun ano" e as medidas dificultan a continuación de moitos outros negocios. "Sobre o papel, non se pechan as tendas, nin as barbarías ou as empresas de servizos turísticos, pero redúcese ao máximo a posibilidade de que realicen o seu traballo de forma viable", apunta a presidenta, Paula Díaz.

Por outra banda, destacan, "existe a incerteza permanente de non saber que medidas se van adoptar nun futuro inmediato", o que lles impide "realizar previsións" a medio prazo.