Por E.P. | SANTIAGO DE COMPOSTELA | 21/01/2021 | Actualizada ás 17:08
O director xeral de Asistencia Sanitaria, Jorge Aboal, asegurou este xoves que, ao longo do ano 2020, o 58% das citas de Atención Primaria foron presenciais e que a demora media para unha consulta de renovación de receitas foi inferior a un día.
Así o dixo durante a Comisión de Sanidade en resposta a unha pregunta formulada polo deputado socialista Julio Torrado en relación ás dificultades dos pacientes crónicos para a renovación semestral das súas receitas.
Julio Torrado explicou que existen "varios problemas á Atención Primaria non presencial", motivada pola pandemia, como "grandes esperas nas rúas", unha "demora nas citas" ou a práctica dun "medicina reactiva" que "se pagará a longo prazo" pola "tardanza en remitir a pacientes a especialistas".
Nestas circunstancias, Torrado incluíu "os problemas para a renovación" das receitas de pacientes crónicos despois do límite de seis meses de dispensación, que están "a cargar sobre os farmacéuticos a responsabilidade" de adiantalos para que "un paciente non deixe de tomar os seus medicamentos".
Fronte a iso, Jorge Aboal asegurou que as máis de 600.000 citas para receitas que rexistrou o sistema galego ao longo do ano pasado tiveron unha espera media "inferior a un día", concretamente 0,78, algo que Julio Torrado afirmou que "non é real".
Ao longo do ano pasado, continuou Aboal, o seguimento telemático de pacientes crónicos aumentou un 140 por cento, ata case 6.000 persoas, e facilitouse aos profesionais a posibilidade de facer uso dun coche con condutor para prestar atención domiciliaria.
Entre outras medidas, o director xeral mencionou a "ampliación do tempo de dispensación dos fármacos, aumentándoo en 10 días" ou a habilitación da entrega informada por parte dos servizos de farmacia hospitalaria, e mesmo o envío de medicación individualizada aos pacientes crónicos.
CONSULTAS TELEFÓNICAS
No ano 2020, a pandemia de coronavirus obrigou a potenciar a atención non presencial, que aumentou un 272 por cen con respecto ao ano anterior en Primaria e un 279 por cen en caso da asistencia dos médicos de familia.
De forma global, o 41,88% das consultas de Primaria foron non presenciais, o 61,22% se se ten en conta as de médicos de familia, dixo Aboal. No entanto, lembrou que o aumento das consultas non presenciais corresponde á adaptación ao período de pandemia, polo que "non é un obxectivo" do sistema sanitario galego.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.