Caballero a Feijóo tras os ataques a Sánchez: "Póñase a gobernar e protexa á xente"
O líder do PSdeG afea ao presidente o "fracaso" da súa "estratexia de salvar o Nadal".
Por Europa Press / Redacción | SANTIAGO DE COMPOSTELA | 27/01/2021 | Actualizada ás 12:01
O secretario xeral do PSdeG, Gonzalo Caballero, manifestou o seu rexeitamento este mércores á estratexia política de "confrontación" e despois dunha intervención do presidente galego, Alberto Núñez Feijóo, moi centrada en atacar ao Executivo que dirixe Pedro Sánchez, lanzoulle unha mensaxe: "Póñase a gobernar e protexa á xente".
No pleno do Parlamento, Caballero cargou contra a "política do anuncio continuo" do mandatario galego, a quen lle gusta, dixo, "porse as medallas cando as cousas van ben", pero despois pon o foco na actuación doutras administracións, sobre todo do Goberno. Por iso, instoulle a centrarse en "gobernar" Galicia e "tomar as decisións" que necesitan os cidadáns.
Non en balde, Caballero alertou de que Galicia está "nunha situación extrema", cunha "crecente" presión asistencial e a UCI "en números máximos de ocupación". E remarcou que os socialistas teñen "a man tendida" para que se adopten as medidas precisas, que "respecta" as restricións cando son necesarias, pero tamén afeou a Feijóo de que a súa "estratexia de salvar o Nadal fracasou".
"Fallou de arriba abaixo", subliñou, aínda que advertiu que os socialistas non pretenden "xogar a ser os capitáns a posteriori", como, dixo, "fixo o PP no Congreso" en ocasións. Tamén lle botou en cara o escaso tempo co que o Diario Oficial de Galicia (DOG) publicou as últimas restricións (apenas dúas horas antes da súa entrada en vigor) e insistiu en que estas medidas se podían tomar "hai 20 días".
"BAIXE DO PEDESTAL" PORQUE "TEN As COMPETENCIAS"
Neste sentido, recalcou que Feijóo debe "baixar do pedestal" e lembroulle que ten "todas as competencias" no marco do Estado de Alarma decretado no ámbito estatal. E reivindicou que medidas como o peche da hostalaría deben ir acompañadas das correspondentes axudas.
Finalmente, afeou que o presidente semente "dúbidas" sobre o plan de vacinación e instoulle a recoñecer o papel do Executivo central á hora de conseguir dose para o país.
