Feijóo sobre a obrigatoriedade de máscaras FFP2: "só pretendo abrir un debate en España"
"Pero non queremos formalizar o debate", aclara.
- Obrigar o uso das FPP2 demostra o "fracaso" de Feijóo na súa estratexia de Nadal, di o PSdeG
- O novo anuncio de Feijóo: pide que sexa obrigatorio o uso de máscaras FFPP2 aínda que el non as utiliza
Por Galicia Confidencial | Compostela | 28/01/2021 | Actualizada ás 16:42
O presidente da Xunta, Alberto Núñez Feijóo, aclarou este xoves que "só pretende abrir o debate en España" sobre a obrigatoriedade de levar máscaras FFP2, máis efectivas que as quirúrxicas para conter o virus, aínda que moito máis caras.
Na rolda de prensa posterior ao Consello da Xunta, o presidente galego dixo que coa súa proposta o que pretende é abrir un debate para saber onde se podería facer obrigatorio o seu uso e tamén para que se abarate o seu custo. "Pero non queremos formalizar o debate", engadiu.
Así, criticou o uso de máscaras que non están homologadas e que poden supoñer unha vía de contaxios da covid. "Hai máscaras de tela que poden ser moi bonitas pero non están homologadas e a máscara FFP2 é a de máxima protección", dixo.
Neste sentido, lembrou que en Alemaña consideran que "é bo usalas no transporte". "Pois, ben, aquí habería que ver onde se poden usar", engadiu. En todo caso, aclarou que "non pretende ir máis alá" con este debate e que só o puxo enriba da mesa ante a "virulencia" das novas cepas do virus.
