Concello de Santiago e Cruz Vermella lanzan un "programa piloto" de urxencias sociais os 365 días do ano as 24 horas do día
Por E.P. | Santiago de Compostela | 30/01/2021 | Actualizada ás 14:44
O Concello de Santiago, en colaboración coa Cruz Vermella, lanzará este ano un novo servizo municipal de urxencias sociais como un "programa piloto" de atención a persoas en situación de vulnerabilidade que operará "os 365 días do ano as 24 horas do día".
Así o anunciou o alcalde, Xosé Sánchez Bugallo, durante o pleno de debate sobre o estado do concello celebrado na mañá deste sábado. Esta nova prestación prevé configurarse como un "servizo básico en calquera momento" para atender situacións "que requiran inmediatez".
O rexedor explicou que será "complementario" a outros servizos municipais naqueles horarios nos que estes "non estean operativos". En concreto, será unha prestación presencial de 15,00 a 23,00 horas e telemática o resto do tempo.
