Por Europa Press / Redacción | Santiago de Compostela | 30/01/2021 | Actualizada ás 15:59
Os centros educativos galegos superaron un día máis o máximo de contaxios rexistrado en todo o curso. Os positivos por COVID-19 nestas instalacións alcanzan xa os 3.725, case un cento máis que o venres e preto de mil máis que hai unha semana. Esta situación obriga a manter pechadas polo menos 184 aulas por decreto da autoridade sanitaria, unhas 24 máis, ademais dun total de sete escolas infantís e un centro de educación especial.
Este último é a CEE Miño do municipio de Ourense, que conta co menos oito casos nas súas instalacións e segue rexistrando novos positivos desde hai días.
O resto son a escola infantil Praia Xardín de Boiro, o PAI de Friol, o de Taboada, a EI de Viveiro, o PAI de Riós, a Unitaria de Forcarei e a infantil Cáritas-Tui.
Un dos datos máis destacados do balance facilitado pola Xunta este sábado é que os centros da área da Coruña superan xa o milleiro de casos activos e suman un total de 1.005, ademais de 44 aulas pechadas. Máis dunha trintena de escolas superan a decena de positivos nas súas instalacións.
Os centros da área de Vigo, pola súa banda, sitúanse en 684 contaxios, unha decena máis, ademais dunhas 57 unidades e unha escola clausuradas.
Na área de Santiago mantéñense en 547 positivos e 14 aulas e unha escola clausurada.
A área de Pontevedra conta con 460 contaxios (uns 22 máis), 17 aulas e unha escola pechada.
Os centros da área de Ourense chegan aos 396 positivos (15 máis), ademais de 21 aulas e dúas escolas pechadas.
Pola súa banda, os centros da área de Lugo suman 364 casos, 20 máis, e 12 unidades e tres escolas pechadas.
Finalmente, na área de Ferrol soben tamén ata os 269 casos e 19 unidades clausuradas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.