Máis de 13.300 agricultores en áreas de montaña ou con limitacións naturais reciben axudas compensatorias
Por E.P. | SANTIAGO DE COMPOSTELA | 01/02/2021 | Actualizada ás 11:21
Un total de 13.336 agricultores galegos beneficiáronse de pagos compensatorios por valor de case 17,9 millóns de euros por desenvolver o seu labor en áreas de montaña ou con limitacións naturais.
O Diario Oficial de Galicia (DOG) recolleu este luns a publicación do Fondo Galego de Garantía Agraria (Fogga) sobre as resolucións das solicitudes de axudas, tramitadas mediante a solicitude unificada da Política Agraria Común (PAC) de 2019, segundo detallou a Consellería do Medio Rural nun comunicado.
Mediante estas subvencións, búscase compensar o esforzo realizado por gandeiros e agricultores de áreas xeográficas con dificultades para desenvolver unha produción agrícola en áreas como a alta montaña ou outras con limitacións naturais.
Deste xeito, un total de 9,5 millóns de euros da cantidade total destínanse a zonas con limitacións naturais de montaña e, os 8,3 millóns de euros restantes, a áreas con outras limitacións.
