Por Jessica Fernández | SANTIAGO DE COMPOSTELA | 16/02/2021 | Actualizada ás 21:35
O reitor da USC Antonio López e o conselleiro do Medio Rural, José González, decidiron afondar na súa colaboración en materia investigadora para potenciar todo o relacionado coa Dieta Atlántica e as súas sinerxías cos produtos agroalimentarios galegos.
Na xuntanza de traballo na que tomaron esa decisión, púxose de manifesto o interese de ambas as dúas partes por impulsar liñas de cooperación no eido da I+D+i vinculadas á Dieta Atlántica, que se fundamenta no consumo de alimentos frescos e de proximidade e no aporte nutritivo que dos alimentos vexetais, dos peixes e mariscos, dos lácteos e das carnes.
Segundo os persoeiros, estas características "coinciden plenamente con diferentes vías de traballo nas que actúa o Goberno galego, a través do impulso á excelencia alimentaria, ás canles curtas de comercialización e aos produtos de calidade diferenciada", é dicir, aqueles amparados con indicación xeográfica protexida, denominación de orixe, procedentes de razas autóctonas ou distinguidos con marcas como o leite de Galega 100%, entre outros.
No encontro tamén participaron o xerente da USC, Xavier Ferreira, o director xeral de Gandaría, Agricultura e Industrias Agroalimentarias, José Balseiros, e o director da Axencia Galega da Calidade Alimentaria (Agacal), José Luis Cabarcos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.