Luís Tosar protagoniza o novo filme de Jorge Coira sobre o lado escuro do poder en España
Estará acompañado de Alexandra Masangkay, a cantante e actriz Bebe, Miguel Rellán, María Botto e Denís Gómez, entre outros.
Por Europa Press / Redacción | Santiago de Compostela | 17/02/2021 | Actualizada ás 17:17
O actor Luís Tosar protagonizará o novo thriller de intriga do director galego Jorge Coira, 'Proxecto Emperador', un filme producido por Vaca Films no que estará acompañado de Alexandra Masangkay, a cantante e actriz Bebe, Miguel Rellán, María Botto e Denís Gómez, entre outros.
Jorge Coira, gañador do Goya á Mellor Montaxe polo 'Descoñecido', é o encargado de dirixir, a partir dun guión escrito por Jorge Guerricaechevarría, este thriller contemporáneo de intriga, inspirado na cara máis oculta da realidade social e política española.
En concreto, 'Proxecto Emperador' revela, a través da ficción, unha recoñecible realidade sociopolítica da España actual. Trátase dun thriller de acción, que introduce ao espectador no mundo dos poderosos e dos que moven os fíos.
Para iso, penétrase na realidade dos axentes de información: un mundo no que a fronteira entre o ben e o mal dilúese e onde as cousas non sempre son o que parecen, recoñece o seu director.
