O expresidente da CEG Fernández Alvariño busca captar fondos europeos para o seu grupo empresarial

Presenta ao actual presidente do patronal catro proxectos para optar a recursos do programa 'Next Generation EU'

Por E.P. | SANTIAGO DE COMPOSTELA | 23/02/2021 | Actualizada ás 17:45

Comparte esta noticia

O presidente do Grupo Alvariño, José Manuel Fernández Alvariño, reuniuse co presidente da Confederación de Empresarios de Galicia (CEG), Juan Manuel Vieites, para presentarlle catro proxectos estratéxicos cos que aspira a captar fondos do programa 'Next Generation EU'.

Segundo informa a patronal galega, trátase da primeira reunión do empresario e expresidente da CEG co novo titular da confederación de empresarios galega, despois de que Vieites anunciase a designación de José Manuel Fernández Alvariño para o comité de expertos que asesorará á organización.

Alvariño trasladou a Vieites os pormenores dos catro proxectos nos que veñen traballando as súas empresas, en liña todos eles cos obxectivos estratéxicos que se marcaron para os fondos europeos que impulsarán a recuperación da economía tras a pandemia.

En concreto, o Grupo Alvariño está a desenvolver dous proxectos no ámbito das enerxías renovables a través das súas insignias Voltfer, especializada en solucións de eficiencia enerxética e instalacións fotovoltaicas de autoconsumo, e Gallaecia Solar, nova compañía do conglomerado centrada na promoción de parques solares fotovoltaicos de tamaño medio.

A estes súmanse outros dous proxectos que parten das divisións TIC do grupo empresarial: Demesix, que achega solucións tecnolóxicas para a xestión da mobilidade urbana, presentará unha iniciativa centrada no avance da mobilidade sustentable nas urbes e localidades galegas; e Galvintec, que traballa nun gran proxecto para o avance do e-commerce na comunidade.

Alvariño e Vieites, reunidos en Vigo. CEG
Alvariño e Vieites, reunidos en Vigo. CEG | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta