CC.OO. critica que non se iniciase a vacinación en centros sanitarios privados e concertados de saúde mental

A Federación de Sanidade de Comisións Obreiras (CC.OO.) denunciou que non se iniciou a vacinación de traballadores e pacientes de centros sanitarios privados e concertados de saúde mental a pesar de que estaba previsto que comezase ao redor de mediados deste mes.

A través dun comunicado, o sindicato criticou que non se comezaron a administrar as doses a estes colectivos, cuxa vacinación asegurou que debía empezar entre os pasados 11 e 21 de febreiro segundo a instrución 4/21 do Sergas. "Como sempre, a saúde mental é a gran damnificada", lamentou.

Así as cousas, o delegado sindical Ramón Pazos reprobou que as persoas con patoloxías psiquiátricas sexan "dobremente castigadas" pola súa enfermidade e o "esquecemento" da Administración, respecto da que recalcou que debe velar pola súa saúde.

Neste sentido, reprobou que a profesionais da área de saúde mental "sigan sendo considerados de segunda división" e o Sergas "incumpra as súas propias instrucións", "abandonándoos á súa sorte". Tamén destacou que o Sergas non deu resposta ás solicitudes de vacinación e as listas de traballadores e pacientes que se lle remitiron "de modo reiterado".

Vacinación contra a covid-19 do persoal sanitario en Galicia | Fonte: Sergas.