O médico galego que pasa como "contrabandista" a Portugal

Napoleón Sánchez é un médico cirurxán residente en Celanova que cada día ten que percorrer máis de 40 quilómetros para ir a traballar en Melgaço, en Portugal. Iso era antes, porque agora ten que facer máis polo feche de fronteiras.

Antes do feche de fronteiras pola covid, utilizaba o paso de Sao Gregório-Ponte Barxas, pero agora está fechado. A única fronteira aberta na zona é a de Tui-Valença, o que obrigaría a este médico a facer un traxecto de 80 quilómetros de ida e outros tanto de volta. Pero o médico Napoleón atopou unha alternativa para evitar ese longo traxecto: atravesar a pé, de forma clandestina, todos os días de mañá, unha pequena pasaxe sobre o río Trancoso. Un punto remoto fronteirizo que non ten vixilancia pero co que aforra diariamente hora e media de traxecto en coche.

"Veño todos os días ás seis da mañá, desde que fecharon a fronteira. Traio un coche até aquí, atraveso e teño outro coche do outro lado", suliña en declaracións ao Jornal de Notícias quen se di sentir "practicamente un contrabandista". "Volvemos á época antiga", lamenta.

O médico, que traballa desde hai 20 anos en Melgaço, considera "ilóxico" ter que facer o percorrido de Celanova até Tui-Valença para atravesar polo único punto autorizado de paso 24 horas. "Nós, traballadores transfronteirizos, non facemos ningunha ilegalidade. En teoría pode haber consecuencias, mais que imos facer?".